PARERE

PARERE

apud Statium l. 2. Sylv. 2. v. 76.

— diversis servat sua terra fenestris.

Haec videt Inarimen, illi Prochyta aspera paret.

Armiger hac magni patet Hectoris —

Est apparere. Iureconsultorum verbum. Petronius,

— paret, non paret, habeto:

Atque esto quidquid Servius et Labeo.

Vide Hug. Grotium, Not. ad Martianum Capellam l. 8. Hinc Parere ad memoriam, apud Ael. Spartianum in Pescennino Nigr. c. 7. Ac postea cum unus ad memoriam, alter ad libellos, paruisset, statim praefecti facti sunt: idem quod apud Herodianum, l. 4. c. 8. προςτῆναι τῆς μνήμης τοῦ βασιλέως. Aliter obsecundare ad memoriam: de memoriae Magistris, qui alias quoque Obsecundatores ad memoriam dicebantur, et Dictatores memoriae. Cuiusmodi munus apud

Carum Imperatorem obiisse legitur Iunius Calphurnius, qui narrante Flav. Vopisco, c. 8. ad memoriam dictabat etc. Istiusmodi Dictator memoriae seu Dictator ad memoriam, Graecis Α᾿ντιγραφεὺς τῆς μνήμης dictus est: quatuor enim Α᾿ντιγραφεῖς sive Dictatores erant, primus Libellorum; secundus Memoriae, tertius Epistolarum; quartus dispositionum, et totidem scrinia; uti legimus apud Anonymum Scholiastem in Iustiniani Novellas, quae a Iuliano Antecessore Latinae factae sunt. Dicti Dictatores a dictando: verba enim tantum commodabant, non etiam manum. Vopisc. c. 7. Hanc Epistolam Claudius ipse dictavit, verba Magistri memoriae nen requiro; habebantque sub se Librarios et Scribas, et eos qui scrinium gerebant. Lamprid in Alex. Severo. c. 31. Post meridianas horas subscriptioni et lectioni Epistolarum semper dedit operam, ita ut ab Epistolis et Libellis, et a Memoria semper assisierent: nonnumquam etiam, si stare per valetudinem non possent, sederent, relegentibus cuncta Librariis et iis, qui scrinium gerebant, ita ut Alexander suâ manu adderet, si quid esset addendum. Iidem, postquam dictâssent, relegentibus Librariis et Scriniariis, dictata recognoscebant, et si quid corrigendum esset, rescribebant ac corrigebant, hinc Α᾿ντιβολεῖς quoque vocati. Quibus omnibus praeerat Magister Scriniorum, quos cum Antigrapheis male confundunt nonnulli: hi enim Magistri Scriniorum non erant, sed proximi. Dicebatur autem Proximus in unoquoque scrinio, qui primus erat et in capite constitutus, ut proximus ab Epistolis, proximus a Libellis, proximus ad Memoriam, atque idem omnino Proximus qui Α᾿ντιγραφεὺς, iidemque proximi, qui et primi, Vide infra in voce Proximus. Et quidem in scrinio Dispositionum, non Proximi, sed Comites tantum, atque Magistri Dispositionum dicebantur coeterorum vero scriniorum Proximi, etiam Comitum titulô ac nomine ornabantur, et Magistri dicebantur. Sic Proximus Memoriae, idem et Magister erat Memoriae, qui in serinio memoriae primus ac princeps militabat; idem dicendum de Proximo Epistolarum, et Proximo Libellorum et Comite Dispositionum. Hi omnes Α᾿ντιγραφεῖς appellabantur, et parebant Magistro Scriniorum, ut dictum, qui omnia scrinia curabat: qualem fuisse legimus Ulpianum sub Alexandro Severo et Papinianum, sub Bassiano, etc. Vide Salmas. ad Flav. Vopiscum in Caro Imper. loc. cit.